MÜTDA rəsmisi müəllimləri sertifikasiya imtahanlarına hazırlaşarkən səriştəsiz təlimçilərin toruna düşməməyə çağırıb.
Oxu.Az xəbər verir ki, bu barədə Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini Vəfa Yaqublu müəllimlərin sertifikatlaşdırma prosesi ilə bağlı danışarkən deyib.
Onun sözlərinə görə, bu proses müəllimlərin keyfiyyət səviyyəsinin artırılmasına xidmət edir:
"Sertifikatlaşdırmadan keçən müəllimlərin maaşlarında artım olur və bu da onlara əlavə motivasiya verir. Sertifikasiyaya yeni başlamışıq deyə cəmiyyətdə bəzən etirazla qarşılanır, amma zaman keçdikcə bu proses daha geniş şəkildə qəbul olunacaq".
V.Yaqublu bildirib ki, sertifikasiyada istifadə olunan test tapşırıqları kurikulumdan kənara çıxmır:
"Bu o deməkdir ki, əgər müəllim coğrafiya fənnini tədris edirsə, onun imtahan sualları da məhz məktəb proqramı çərçivəsində hazırlanır. Suallar kifayət qədər sadədir. Lakin mən vətəndaş olaraq hesab edirəm ki, müəyyən qədər çətinlik də olmalıdır. Çünki müəllim şagirdə öyrətdiyindən daha artıq biliyə sahib olmalıdır".
O əlavə edib ki, müəllimlərin işə qəbul və sertifikasiya imtahanlarında eyni vaxtda, eyni suallarla imtahan edilməsi şəffaflığa xidmət edir.
MÜTDA rəsmisi müəllimlərə xəbərdarlıq da edib. O bildirib ki, hazırlıq mərhələsində müəllimlər yalnız rəsmi mənbələrə etibar etməli, qeyri-peşəkar və səriştəsiz şəxslərin yayımladığı videolardan, hazırlıq kurslarından uzaq durmalıdırlar:
"Bəzən maraq xatirinə "YouTube"da sertifikasiya imtahanlarına hazırlıqla bağlı videolara baxıram. Görürəm ki, bu videoları hazırlayanlar arasında səriştəsiz şəxslər var. Onlar orfoepiya qaydalarına əməl etmirlər. Onların "sual belə olsa, belə cavab verin" demələri, kasad leksikaları narahatlıq doğurur. Çünki biz kimi dinləyiriksə, onun kimi danışırıq. Eyni zamanda, biz təkcə testə hazırlaşmırıq. Müsahibə mərhələsində sizin nitqinizin səlisliyi, leksikanızın zənginliyi qiymətləndiriləcək. Əgər hazırlıq müddətində səriştəsiz insanlarla çalışacaqsınızsa, müsahibə nəticələriniz zəif ola bilər. Buna görə müəllimlər hazırlıq zamanı ehtiyatlı olmalı, işbazların qurbanına çevrilməməlidirlər".
O, sertifikasiya imtahanına hazırlaşanlara video.edu.az portalına daxil olaraq oradakı materiallardan istifadə etməyi tövsiyə edib. Bildirib ki, müəllimlər, eyni zamanda, fənləri üzrə əlavə ədəbiyyatlarla tanış olmalı, daha geniş biliyə yiyələnməlidirlər:
"Bu, onlara imtahandan uğurla keçməyə və müsahibə mərhələsini rahat başa vurmağa kömək edəcək".
Aləmdə Nəsib
