Polkovnik Samir Həziyev əsgərin itkin düşməsi ilə bağlı həbs edilibmiş

Naxçıvanda N saylı hərbi hissənin komandiri, polkovnik Samir Həziyev həbs edilib. Ona qarşı Cinayət Məcəlləsinin 341.2.3-cü (bir qrup şəxs tərəfindən vəzifə səlahiyyətlərindən sui-istifadə etmə və ya vəzifə səlahiyyətlərini aşma bir qrup şəxs tərəfindən ağır nəticələrə səbəb olduqda) maddəsi ilə ittiham verilib.

"Qafqazinfo"nun hüquq-mühafizə orqanlarından əldə etdiyi məlumata görə, Samir Həziyev ötən ay itkin düşmüş, sonradan qətlə yetirilmiş halda tapılan əsgər Ceyhun Tofiq oğlu Hüseynovun cinayət işi ilə əlaqədar istintaqa cəlb edilib.

Polkovnik Ceyhun Hüseynovun xidmət etdiyi hərbi hissənin komandiri olub.

Aparılmış istintaqla müəyyən edilib ki, əsgər Hüseynov hərbi hissəni icazəsiz tərk edib və meyiti iki gün sonra Naxçıvan Muxtar Respublikasının Şərur rayonunun Günnüt yaşayış məntəqəsi istiqamətində yerləşən ərazidə aşkar edilib.

Hərbi hissə komandiri isə ona görə ittiham olunur ki, o, əsgərin itkin düşməsi ilə bağlı dərhal zəruri tədbirlər görməyib, araşdırma aparmayıb.

Bu səbəbdən onun barəsində cinayət işi başlanılıb, həbsinə qərar verilib. Polkovnik isə ittihamı qəbul etmir. O, qərardan apellyasiya şikayəti verib.

Qeyd edək ki, Ceyhun Hüseynov ölkənin ən savadlı gənclərindən biri olub. Belə ki, o, 2016-cı ildə Akademik Zərifə Əliyeva adına liseyi qızıl medalla bitirib. Həmin il 627 balla ADA Universitetinin Beynəlxalq münasibətlər ixtisasına daxil olan Ceyhun daha sonra Yaponiyada mübadilə proqramı çərçivəsində təhsil alaraq yüksək göstərici ilə məzun olub. Magistr dərəcəsini Təl-Əvivdə alan Ceyhun Vətənə qayıtdıqdan sonra hərbi xidmətə yollanıb.