Problemli aktivlərin geri qaytarılmasında ən böyük maneələrin nə olduğu açıqlanıb.
Oxu.Az-ın Şamaxıya ezam olunmuş əməkdaşı xəbər verir ki, bu fikirləri Əmanətlərin Sığortalanması Fondunun Hüquq departamentinin direktoru Azər Əmirov "Milli Mətbuat Günü: dialoq və əməkdaşlıq forumu"nda deyib
O bildirib ki, buna ən böyük maneə məhkəmə və icra prosesidir:
"Ləğv prosesində olan banklarda problemlər əsasən irihəcmli biznes kreditlərində müşahidə olunur. İstehlak kreditlərində isə vəziyyət nisbətən yaxşıdır. "DəmirBank" ləğv prosesinə başladıqdan sonra onun müştəri bazasının böyük hissəsini mikrokreditlər təşkil etdiyindən, həmin bank üzrə vəsaitlərin yığımı digər ləğv olunan banklarla müqayisədə daha yüksək olub. Biznes kreditlərinin geri qaytarılması isə daha mürəkkəb prosesdir. Çünki biznes müştəriləri banklardan yalnız kredit deyil, zəmanət məktubları, akkreditivlər, hesablaşma xidmətləri və digər bank məhsullarından da istifadə edirlər. Nəticədə ləğv prosesində olan bank qarşısındakı öhdəliklər ikinci plana keçir və gecikmələr yaranır. Bu isə məhkəmə çəkişmələrinə səbəb olur. Bir çox hallarda kreditlərin rəsmiləşdirilməsi zamanı yol verilmiş nöqsanlar məhkəmə proseslərini uzadır".
Qurum rəsmisi əlavə edib ki, məhkəmənin qərarından sonra icraat hissi başlayır:
"İcra məmurları barədə şikayətlər verilir, bu isə icra prosesini ləngidir. Nəticədə vəsaitin geri qaytarılması gecikir".
