Şəhidin qardaşı: "31 ildən sonra gözümüz yoldan yığıldı"

"Otuz bir ildən sonra gözümüz yoldan yığıldı".

Oxu.Az xəbər verir ki, bu sözləri jurnalistlərə açıqlamasında Birinci Qarabağ müharibəsində itkin düşmüş, 31 il sonra qalıqları identifikasiya edilərək bu gün Sumqayıtda dəfn olunan şəhid Yusif Məmmədovun qardaşı Sərvər Məmmədov deyib.

O qeyd edib ki, qardaşı hərbi xidmətə könüllü gedib:

"Yusif subay idi. Mən əsgərlikdən qayıdandan bir il sonra hərbi xidmətə getdi. O vaxt SSRİ dövründə Özbəkistanda xidmət etmişdi. Oradan gələn kimi səfərbərlik oldu, könüllü olaraq cəbhəyə yollandı. Axırıncı dəfə 31-32 il əvvəl görmüşəm. Yanvar ayında yenidən hərbi xidmətə yollanan qardaşımdan fevralın 4-dən 7-nə qədər xəbər ala bilmədik. O, Kəlbəcər-Murovdağ döyüşlərində iştirak edib".

Sərvər Məmmədov qeyd edib ki, şəhidin nəşinin qalıqları Gəncədən tapılıb:

"O vaxt Gəncə şəhəri Şəhidlər xiyabanında dəfn olunduğunu demişdilər, biz götürmədik. Çünki uyğunsuzluq olmuşdu. Deyilən qəbir onun deyildi. Daha sonra 34-cü qəbirdən nəşi tapıldı".

O nəhayət təsəlli tapdıqlarını söyləyib:

"İllər sonra qardaşımın nəşinin tapılmasından biz təsəlli tapırıq. Axır ki, tapıldı, gəldi, gözümüz yoldan çəkildi. 31 il idi ki, gözümüz yolda qalmışdı".

Aygün Mirakif