"Səs zibilliyi" və kompensasiya: "Tezlik normanı aşırsa, iş saatı da az olur"

Yaşadığımız cəmiyyətdə hər gün müxtəlif səslər eşidirik. Bu səsləri istəməsək belə, beynimiz qəbul edir. Hətta bəzən "səs başıma düşdü" deyimindən istifadə edirik.

Bəs görəsən, səs kirliliyinin insan psixologiyasına təsirləri varmı?

Oxu.Az mövzu ilə bağlı psixoloq Elmir Əkbərin fikirlərini öyrənib.

Ekspert bildirib ki, Azərbaycanda hazırda səslərin hamısı bir-birinə qarışıb:

"Bu səslərin insana həm psixoloji, həm də fizioloji baxımdan mənfi təsiri var. Tibb təhsili alan zaman səsin ekologiyası, gigiyenası, eşitmə gigiyenası kimi anlayışlar öyrədilir. Bu anlayışlar ona görə tədris edilir ki, insanın beyni və orqanlarının səsi hansı həddə qədər qəbul etdiyi öyrənilsin. Məsələn, müəssisələrdə istifadə edilən bəzi aparatların səs tezliyi ölçülür, insan sağlamlığına zərərləri hesablanır. Əgər səs tezliyi normanı aşırsa, həmin müəssisədə çalışmaq çox zərərlidir. Hətta bu tip müəssisələrdə zərərli səslərlə çalışan şəxslərə əlavə ödənişlər edilir, qeydlər aparılır. Buna görə də iş saatı az olur".

E.Əkbər əlavə edib ki, bizim toylar "səs zibilliyi"nə oxşayır:

"Səsi, sənəti olmayan müğənniləri gətirib oraya atırlar, onlar da tullanıb-düşürlər. Bundan başqa, musiqi alətlərinin səsi çox eybəcər formada səsləndirilir. Fikrimcə, bu, şadlıq saraylarına sərf edir, düşünülmüş şəkildə edirlər. Belə olan halda qonaqlar normal qidalana bilmirlər. İçkilər və sair müəssisənin sahibinə qalır".

Məhərrəm Əliyev