Tədris-Cərrahiyyə Klinikası aylardır həkimlərin maaşlarını ÖDƏMİR?

Azərbaycan Tibb Universitetinin (ATU) Tədris-Cərrahiyyə Klinikasının həkimləri bir neçə aydır, əməkhaqqılarını ala bilmirlər. Bununla bağlı xəstəxana kollektivi arasında narahatlıq yaranıb.

Oxu.Az Bizim.media-ya istinadən xəbər verir ki, İcbari Tibbi Sığorta üzrə Dövlət Agentliyinin ödənişləri vaxtlı-vaxtında həyata keçirdiyi, lakin Tədris-Cərrahiyyə Klinikası tərəfindən müvafiq ödənişlərin vaxtında verilmədiyi bildirilir.

Qeyd olunur ki, klinikada texniki təminatla bağlı da problemlər var. Belə ki, sözügedən xəstəxanada MRT və anju aparatları işləmir.

Məsələ ilə bağlı Tədris-Cərrahiyyə Klinikasından bildirilib ki, müəssisədə bütün tibbi heyətin, o cümlədən həkimlərin əməkhaqqıları vaxtında ödənilir:

"Müraciətdə qeyd olunan məsələyə gəldikdə isə bəzən həkimlərə verilən bonusların gecikməsi halları yaşana bilir. Bunun səbəbi ay ərzində bonusların hesablanması üçün reyestrlərin yoxlanılması prosesinin müəyyən vaxt tələb etməsi ilə əlaqədardır".