"Doğma yurdumuzu yenidən qurmaq bizim öhdəliyimizə düşür".
Bunu Oxu.Az-a açıqlamasında Zəngilanın Cahangirbəyli kəndindən olan keçmiş məcburi köçkün Vaqif Əsgərov deyib.
O xatırladıb ki, məcburi köçkün kimi Bakının Nərimanov rayonunda yaşayıblar:
"Oradan üç nəfər çıxmışdıq, indi isə beş nəfərik, elimizə qayıdırıq. Hamımız xoşbəxtik. Bakı şəhərinin Nərimanov rayonunda məskunlaşmışdıq. 38 yaşımda doğma yurdumdan çıxmışam, indi 70 yaşım var. Gəncliyimizi orada yaşamışıq. Hər şey yaxşı idi. Təəssüf ki, sonradan işğal başladı, doğma kəndimizdən ayrı düşdük. Şükür ki, indi qayıdırıq. Bundan sonra doğma yurd-yuvamızı yenidən inşa etməyi planlaşdırırıq".
Müsahibimiz yaradılan şəraitə görə ölkə başçısına təşəkkür edib:
"Allah Prezident İlham Əliyevə can sağlığı versin. Şəhidlərimizə rəhmət, qazilərimizə uzun ömür diləyirəm. Bu gün onların sayəsində doğma kəndimizə qayıdırıq".