Niderlandın cəzaçəkmə müəssisələrində yer çatışmazlığı səbəbindən bəzi məhbusların cəza müddəti başa çatmamış azadlığa buraxılması gözlənilir.
Oxu.Az xəbər verir ki, bu barədə NU.nl portalı Ədliyyə Nazirliyinin dövlət katibi Klaudiya van Brüggenin ölkə parlamentinə ünvanladığı məktuba istinadən məlumat yayıb.
Məlumata görə, məhbusların cəza müddəti maksimum dörd həftə azaldılacaq. Bu tədbir yalnız iki ilədək (iki il də daxil olmaqla) azadlıqdan məhrumetmə cəzasına məhkum edilmiş kişilərə şamil olunacaq.
Portalın məlumatına əsasən, Van Brüggen əvvəllər də belə bir ehtimalı istisna etmirdi. Lakin indi onun sözlərinə görə, penitensiar sistemdə vəziyyətin getdikcə ağırlaşması hökuməti bu addımı atmağa məcbur edir.
Xatırladaq ki, hələ 2024-cü ilin sonlarında Van Brüggenin Ədliyyə Nazirliyinin dövlət katibi vəzifəsindəki sələfi İnqrid Kunradi həbsxanalarda ciddi yer çatışmazlığının olduğunu bildirmişdi. O, məhbusların cəza müddəti başa çatmazdan iki həftə əvvəl azadlığa buraxılmasını nəzərdə tutan xüsusi plan hazırlamışdı.