"Son dövrlərdə vətəndaşların üzləşdiyi ciddi problemlərdən biri də kiberdələduzluqdur. Xüsusilə insanların bank kartları, elektron hesabları və şəxsi məlumatlarının müxtəlif rəqəmsal üsullarla ələ keçirilməsi cəmiyyət tərəfindən ciddi narahatlıq doğurur".
Oxu.Az xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin bugünkü iclasında deputat Səbinə Salmanova deyib.
O, bununla bağlı təklif irəli sürüb:
"Cinayət Məcəlləsinin 178-ci maddəsi dələduzluğu ümumi formada tənzimləyir. Hesab edirəm ki, rəqəmsal texnologiyalardan istifadə etməklə törədilən yeni dələduzluq üsullarının qanunvericilikdə daha dəqiq əks olunmasına ehtiyac var. Təklif edirəm ki, 178-ci maddəyə elektron informasiya sistemlərindən və rəqəmsal texnologiyalardan istifadə etməklə dələduzluq törədilməsini ayrıca hal kimi müəyyən edən müddəanın əlavə edilməsi məsələsinə baxaq.
Burada saxta bank əməkdaşı kimi təqdim olunmaq, elektron ödəniş vasitəsilə vəsait mənimsəmək, həmçinin süni intellektlə hazırlanmış saxta səs və görüntülərdən istifadə etməklə şəxsi aldatmaq kimi və s. hallar nəzərdə tutula bilər. Eyni zamanda bu istiqamətdə aidiyyəti dövlət qurumlarının, bank və ödəniş sektorunun nümayəndələrinin iştirakı ilə dinləmələrin keçirilməsini və mövcud hüquqi mexanizmlərin təhlil edilməsini iş planına daxil edilməsini təklif edirəm".
