Zərdab rayonunda baş verən yol-nəqliyyat hadisəsi nəticəsində xəsarət alan üç nəfərin vəziyyəti açıqlanıb.
Oxu.Az-ın sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib ki, xəsarət alan üç kişi iyulun 15-i saat 23:30-da Zərdab Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
Açıqlamada qeyd olunub ki, onlara bədənin müxtəlif nahiyələrinin travmaları diaqnozu qoyulub və zəruri tibbi xidmət göstərilib:
"Hazırda yaralıların müalicəsi xəstəxananın Cərrahiyyə şöbəsində davam etdirilir. Onların vəziyyəti qənaətbəxş qiymətləndirilir".
Zərdab rayonunda yol-nəqliyyat hadisəsi baş verib.
Oxu.Az-ın əldə etdiyi məlumata görə, hadisə iyulun 15-i saat 23 radələrində Zərdab şəhərinin Heydər Əliyev prospektində qeydə alınıb.
Belə ki, şəhər sakini, 1982-ci il təvəllüdlü Samir Hüseynli KIA markalı, 50-EC-874 dövlət qeydiyyat nişanlı avtomobilə idarəetməni itirib, nəticədə nəqliyyat vasitəsi ağaca çırpılıb.
Qəza nəticəsində sürücü Samir Hüseynli, eləcə də sərnişinlər - onun həmyerliləri, 2003-cü il təvəllüdlü Aydın Əhmədov və qardaşı, 2004-cü il təvəllüdlü Amil Əhmədov xəsarət alaraq xəstəxanaya yerləşdiriliblər.
Məlumata görə, yaralıların vəziyyəti qənaətbəxşdir.
Faktla bağlı Zərdab Rayon Polis Şöbəsində araşdırma aparılır.
