ABŞ-də geoloq təsadüfən 2,5 milyon il əvvəl yaşamış Buz dövrü Sakit okean mastodontunun nəhəng dişini tapıb.
Oxu.Az bildirir ki, bu barədə "The Sun" nəşri məlumat verib.
Məlumata görə, geomorfoloq Briqid Linç qeyri-adi predmeti Kaliforniyadakı çayın yatağında aşkar edib. O bu ərazidə qırmızıayaqlı qurbağanın yaşayış mühitinin yaxşılaşdırılması üzrə layihədə iştirak edirdi. Əvvəlcə alim tapıntının qeyri-adi formalı daş olduğunu düşünüb, şəklini çəkib və işini davam etdirib.
"Mən çay yatağında daşları nəzərdən keçirirdim və ayağım ona ilişdi, onun çox qəribə forması var", - deyə Briqid Linç qeyd edib.
Daha sonra mütəxəssislər müəyyən ediblər ki, tapıntı yetkin Sakit okean mastodontunun yaxşı qorunmuş üst dişidir. Tədqiqatçıların qiymətləndirməsinə görə, heyvan öldüyü zaman təxminən 40 yaşında olub. Fosilin dəqiq yaşı hələ ki müəyyən edilməyib.
Tapılan diş Stanford Universitetinin "Doerr" Dayanıqlı İnkişaf Məktəbinə verilib. Alimlər radiokarbon tarixləndirməsi aparmağı, heyvanın rasionunu və o dövrün iqlimini öyrənməyi, eləcə də tapıntının 3D skanını və təhsil məqsədləri üçün surətini yaratmağı planlaşdırırlar.
Sakit okean mastodontu 2019-cu ildə ayrıca növ kimi tanınıb. O, Amerika mastodontundan daha dar dişləri və nəhəng ətraf sümükləri ilə fərqlənirdi. Bu heyvanlar Pleystosen dövründə Şimali Amerikanın qərbində yaşayıblar və təxminən 11 000 il əvvəl nəsilləri tükənib.
