ABŞ İmmiqrasiya və Gömrük Xidməti (ICE) Hökumət Səmərəliyi Departamenti (DOGE) ilə birlikdə qeyri-qanuni miqrantların aşkarlanması üçün yeni bir yanaşma hazırlayır. Bu məsələ səhiyyə və şəxsi məlumatların qorunması sahəsində ekspertlər arasında ciddi narahatlıq doğurub.
Oxu.Az-ın verdiyi məlumata görə, bu barədə "The Washington Post" xəbər yayıb.
Bildirilir ki, ABŞ hökuməti potensial qeyri-qanuni miqrantların yerini izləmək məqsədilə populyar "Medicaid" və "Medicare" tibbi sığorta proqramlarının məlumat bazalarına giriş əldə etməyi planlaşdırır.
Qeyd edək ki, 1965-ci ildə prezident Lindon Consonun islahatları çərçivəsində başladılan "Medicaid" və "Medicare" proqramları milyonlarla aztəminatlı və yaşlı amerikalını tibbi sığorta ilə təmin edir. Bu proqramların məlumat bazaları təkcə xəstələrin sağlamlıq vəziyyəti haqqında məlumatları deyil, həm də onların aktual yaşayış ünvanlarını ehtiva edir. Görünür, məhz bu məlumat miqrasiya xidmətləri üçün xüsusi maraq kəsb edir.
ICE və DOGE-nin təşəbbüsü ABŞ səhiyyə sisteminin hazırkı və keçmiş əməkdaşları arasında dərin narahatlıq yaradıb. Ekspertlər bu cür hərəkətlərin qanuniliyinə şübhə edib və mümkün mənfi nəticələr barədə xəbərdarlıq ediblər.
