ABŞ-nin "Space X" korporasiyası dünya okeanının səviyyəsindəki dəyişiklikləri müşahidə etmək üçün nəzərdə tutulmuş "Sentinel-6B" peykini Yer orbitinə çıxarıb.
Oxu.Az xəbər verir ki, bu barədə ABŞ-nin Aeronavtika və Kosmik Fəzanın Tədqiqi üzrə Milli İdarəsinin (NASA) saytında məlumat verilib.
"Falcon-9" daşıyıcı raketi bazar ertəsi ABŞ-nin şərq sahilinin vaxtı ilə saat 0:21-də (Bakı vaxtı ilə saat 9:21-də - red.) ABŞ Hərbi Hava Qüvvələrinin Vandenberq bazasından (Kaliforniya ştatı) start götürüb.
"Peyk hava proqnozlarının dəqiqləşdirilməsi, gəmiçiliyin təhlükəsizliyinin təmin edilməsi və sahilyanı regionların qorunması üçün dəniz səviyyəsi barədə 30 il ərzində toplanmış məlumatlara əsaslanacaq", - deyə NASA-dan bildirilib.
"Sentinel-6B" NASA və Avropa Kosmik Agentliyinin əməkdaşlığı ilə layihələndirilib və Almaniyada "Airbus Defence and Space" şirkəti tərəfindən yığılıb. 2020-ci ilin noyabrında "Space X" oxşar "Sentinel-6" peykini orbitə çıxarıb.
