İran və ABŞ nüvə sazişi üzrə danışıqların yeni mərhələsinin yeri və vaxtı ilə bağlı hələlik razılığa gələ bilməyiblər.
Oxu.Az TASS-a istinadən xəbər verir ki, bunu İran Xarici İşlər Nazirliyinin rəsmi nümayəndəsi İsmayıl Bəqai bildirib.
"Hələlik bu məsələ ilə bağlı tarix, vaxt və ya yer müəyyən edilməyib", - o həftəlik brifinqdə bildirib.
Bəqainin sözlərinə görə, İran diplomatik səylərin və danışıqlar prosesinin məhsuldarlığına əmin olmayana qədər müzakirə masasına qayıtmayacaq.
2025-ci ilin aprel ayından etibarən İran və ABŞ Omanın vasitəçiliyi ilə Tehranın nüvə proqramı ətrafında yaranmış vəziyyəti həll etmək üçün dolayı danışıqlar aparır. Yeni razılaşma əldə etmək üçün bir neçə cəhddən sonra uranın zənginləşdirilməsi ilə bağlı fikir ayrılıqları səbəbindən məsləhətləşmələr iflasa uğramaq riski ilə üzləşib. İki ölkənin nümayəndə heyətləri arasında danışıqların altıncı raundu iyunun 15-də Maskatda keçirilməli idi, lakin İsrailin İrana hücumundan sonra məsləhətləşmələr ləğv edildi.
