ABŞ Ədliyyə Nazirliyi İranın neft tankerlərinin hərbi yolla ələ keçirilməsini və müsadirə edilən yüklərin ABŞ-nin mülkiyyətinə keçirilməsini asanlaşdırmaq üçün uzun müddətdir fəaliyyət göstərməyən dəniz mükafat məhkəmələrini yenidən işə salmağa hazırlaşır.
Oxu.Az xəbər verir ki, "Bloomberg" bu barədə məlumatlı üç mənbəyə istinadən yazıb.
Agentliyə məlumatı Hyustondan olan federal prokuror Aaron Rayts da təsdiqləyib. O bildirib ki, nazirlik "qədim dəniz hüququ institutu" kimi tanınan mükafat məhkəmələrindən istifadə etməyi planlaşdırır.
Bu mexanizmin bərpası ABŞ prokurorlarına düşmən və ya neytral gəmilərdən müsadirə edilən neft və digər yükləri daha sürətli şəkildə ABŞ-nin mülkiyyətinə keçirməyə imkan verə bilər. Daha sonra müsadirə olunan əmlak satılacaq və əldə edilən vəsait dövlət büdcəsinə yönəldiləcək.
Mükafat məhkəmələri müharibə dövründə dövlətə düşmən gəmilərini və yüklərini qanuni şəkildə ələ keçirmək və müsadirə etmək imkanı verən dəniz hüququ mexanizmidir. Bu sistem XVIII-XIX əsrlərdə, xüsusilə Böyük Britaniya və ABŞ tərəfindən rəqib ölkələrin ticarətinə zərbə vurmaq və dövlət xəzinəsini artırmaq məqsədilə geniş istifadə olunub.
Ələ keçirilən gəmi limana aparılır, məhkəmə isə müsadirənin qanuniliyini araşdıraraq gəminin və yükün müsadirə edilməsi və satılması barədə qərar verirdi.
ABŞ 1898-ci il İspaniya-ABŞ müharibəsindən sonra bu mexanizmdən demək olar ki, istifadə etməyib. İkinci Dünya müharibəsindən sonra isə sistem faktiki olaraq fəaliyyətini tam dayandırıb. Bunun əvəzinə sanksiyaları pozan gəmilərin müsadirəsi üçün mülki müsadirə prosedurundan istifadə olunurdu. Lakin bu proses daha uzun çəkir və üçüncü tərəflərin prosesə daha geniş şəkildə qoşulmasına imkan verir.
