ABŞ İŞİD-ə qarşı beynəlxalq koalisiyanın İraqdakı müxtəlif obyektlərindəki qüvvə və texnikasını Ərbil beynəlxalq hava limanına köçürür.
Oxu.Az xəbər verir ki, bu barədə "The National" nəşri özəl mənbələrinə istinadən məlumat yayıb.
"Bu aktivliyin qoşunların tam çıxarılmasına işarə olub-olmadığı hələlik məlum deyil. Lakin Bağdad və İraq Kürdüstanındakı mənbələr qeyd edirlər ki, ötən həftə ərzində hərbçilər koalisiya bazalarından müdafiə sistemlərini və köməkçi avadanlıqları Ərbil aeroportuna daşıyıblar", - deyə açıqlamada qeyd olunub.
Əsasən hava hücumundan müdafiə (HHM) sistemlərinin elementlərinin daşınmasından söhbət gedir. Mənbələrin sözlərinə görə, koalisiya qüvvələrinin tərkibində xidmət edən Böyük Britaniya, Fransa və Almaniya hərbçilərinin bir hissəsi artıq Ərbili tərk edib.
İyulun sonlarında İraq Kürdüstanında koalisiya qüvvələrinin əsas mərkəzi hesab olunan Ərbil aviabazasından tutucu raketlərdən ibarət konvoylar çıxarılıb. Müsahiblərdən biri qeyd edib ki, bu, qüvvələrin adi yerdəyişməsi deyil.
"Biz müəyyən bir yerdə yerləşdirilmiş müdafiə sistemlərinin nəqliyyat vasitələrinə yüklənərək aparıldığını müşahidə edirik", - deyə məlumatda qeyd olunub.
O əlavə edib ki, İraq Kürdüstanı rəhbərliyinə qüvvələrin bu yerdəyişməsi barədə əvvəlcədən heç bir rəsmi xəbərdarlıq edilməyib.
"The National" xatırladır ki, 2024-cü ildə İraq və ABŞ koalisiyanın hərbi missiyasının 30 sentyabr 2026-cı ilədək başa çatdırılması barədə saziş imzalayıblar. Tərəflər razılaşıblar ki, ABŞ-nin gələcək hərbi iştirakı yalnız Bağdad və Vaşinqton arasındakı ikitərəfli müqavilələrlə müəyyənləşəcək, eləcə də hərbi təlimlər, kəşfiyyat məlumatlarının mübadiləsi və silah satışı üzərində cəmləşəcək.
Bununla belə, regionda münaqişə başlayandan bəri ABŞ-nin İraqdakı mövqeləri İranla əlaqəsi olan İraq silahlı qruplaşmaları tərəfindən və ya birbaşa İran ərazisindən dəfələrlə hücuma məruz qalıb. Nəticədə bir neçə amerikalı hərbçi və dinc sakin həlak olub və ya yaralanıb.
