Ağ Ev Qrenlandiyadan qazana biləcəyi gəlirlərin təhlilini aparır

ABŞ Prezidenti Donald Trampın Administrasiyası Qrenlandiyanın potensial olaraq ölkəyə birləşdirilməsi məsələsini aktiv şəkildə araşdırır. Hazırda adanın ABŞ ştatlarından biri kimi saxlanması üçün ehtimal olunan xərclərin hərtərəfli qiymətləndirilməsi aparılır.

Oxu.Az-ın verdiyi məlumata görə, bu barədə "The Washington Post" qəzeti öz mənbələrinə istinadən məlumat verib.

Bildirilir ki, ABŞ administrasiyası adanın 58 min sakininə dövlət xidmətlərinin göstərilməsi dəyəri də daxil olmaqla, bütün mümkün xərclərini nəzərə almağa çalışır. Həmçinin mineral resursların hasilatından federal büdcəyə mümkün daxilolmaların təhlili aparılır: proqnozlar sərt hava şəraiti və adanın əlçatmazlığı səbəbindən çətinləşir. Variantlardan biri kimi, Qrenlandiya hakimiyyətinə adanı ildə təxminən 600 milyon dollar məbləğində subsidiyalaşdıran Danimarka hökuməti ilə müqayisədə daha sərfəli təklif etmək imkanı nəzərdən keçirilir.

Tramp dəfələrlə bəyan edib ki, Qrenlandiya ABŞ-yə birləşdirilməlidir. O, Danimarkanı adadan imtina etməsə, ona qarşı yüksək ticarət rüsumları tətbiq edəcəyi ilə hədələyib. Tramp hələ ilk prezidentlik müddətində Qrenlandiyanı almağı təklif edib. Danimarka və Qrenlandiya hakimiyyətləri bu ideyanı rədd edib.

Qrenlandiya Danimarkanın tərkibinə muxtar ərazi hüququ ilə daxildir. 1951-ci ildə Vaşinqton və Kopenhagen NATO üzrə öhdəliklərə əlavə olaraq müqavilə imzalayıblar. Buna əsasən, ABŞ adanı təcavüzdən müdafiə etmək öhdəliyini öz üzərinə götürüb.