"Qrenlandiyaya investisiya yatırılması məsələsi ABŞ-nin razılığı əsasında həllini tapacaq".
Oxu.Az xəbər verir ki, bu barədə ABŞ-nin dövlət katibi Marko Rubio "Fox News" telekanalına müsahibəsində bildirib.
Rubionun sözlərinə görə, ada ilə bağlı əldə olunmuş yeni saziş Vaşinqtona Şimali Amerikanın raket hücumundan müdafiə qalxanı üçün əlavə hərbi obyektlər inşa etmək imkanı verir.
"Hazırda müddətsiz olaraq qüvvədə olan bu razılaşmaya əsasən, Birləşmiş Ştatların heç bir rəqibi bizim təsdiqimiz olmadan ora sərmayə yatıra bilməyəcək", - deyə Rubio vurğulayıb.
Ötən həftə ABŞ prezidenti, həmçinin Danimarka və Qrenlandiyanın baş nazirləri adanın təhlükəsizliyinin təminatı üzrə öhdəliklərin bir hissəsinin Vaşinqtona verilməsini nəzərdə tutan sənəd imzalayıblar. Bu müqavilə ABŞ-yə Qrenlandiyada hərbi mövcudluğunu genişləndirmək prosesinə, o cümlədən adada iki hərbi bazanın tikintisinə dərhal başlamağa şərait yaradıb. Bundan əlavə, saziş NATO-ya üzv olmayan ölkələrin hərbi bazalarının Qrenlandiyada yerləşdirilməsinə qadağa qoyulmasını, Rusiya və Çindən gələn sərmayələri bloklamağa imkan verəcək xüsusi investisiya yoxlanışı mexanizminin yaradılmasını, eləcə də ada əhalisinin öz siyasi gələcəyini müstəqil şəkildə seçmək hüququnu özündə ehtiva edir.
