Meynut Universitetinin astrofizikləri müasir astronomiyanın əsas sirlərindən birinə - qara dəliklərin Böyük Partlayışdan bir neçə yüz milyon il sonra fövqəlkütlə toplaya bilməsinə dair yeni izah təklif ediblər.
Oxu.Az xəbər verir ki, tədqiqat "Nature Astronomy" jurnalında dərc olunub.
Kompüter simulyasiyaları göstərib ki, erkən kainatda son dərəcə sıx və xaotik şərait mövcud olub və bu mühitdə qara dəliklərin hətta kiçik "rüşeymləri" belə anormal dərəcədə yüksək sürətlə böyüyə bilib.
Tədqiqatın rəhbəri, Meynut Universitetinin aspirantı Daksal Mehtanın sözlərinə görə, Böyük Partlayışdan cəmi bir neçə yüz milyon il sonra yaranan ilk qara dəliklər ətraf maddəni mümkün hesab ediləndən daha sürətlə udaraq əsl "qidalanma vəhşiliyi" yaşayıblar.
Erkən qalaktikalarda qazın yüksək sıxlığı belə sürətli böyümə mərhələlərinin dəfələrlə baş verməsinə imkan verib və nəticədə qara dəliklər Günəşin kütləsi ilə müqayisədə onminlərlə dəfə ağırlaşıb.
