Arıqlamaq üçün istifadə edilən dərmanlar onlarla britaniyalının ölümünə səbəb olub

Böyük Britaniyada 80-dən çox insan şəkərli diabetin müalicəsi üçün istifadə olunan və eyni zamanda, arıqlama məqsədilə qəbul edilən preparatların tətbiqi nəticəsində vəfat edib.

Bu barədə Oxu.Az ölkənin Dərman Vasitələri və Tibbi Məhsulların Tənzimlənməsi Agentliyinə (MHRA) istinadən məlumat verir.

Söhbət Danimarkanın "Novo Nordisk" şirkəti tərəfindən istehsal edilən "Ozempic" və ABŞ-nin "Eli Lilly" əczaçılıq şirkətinin məhsulu olan "Muncaro" ("Mounjaro") preparatlarından gedir.

Yanvar ayının sonuna qədər agentlik arıqlama məqsədilə bu cür preparatların istifadəsi ilə bağlı 22 ölüm halı qeydə aldığını bildirib. Daha 60 ölüm hadisəsi isə ikinci tip diabetin müalicəsi üçün bu dərmanların qəbulu ilə əlaqələndirilib.

"Bu vasitələr satışa çıxdığı vaxtdan bəri təxminən 400 nəfər stasionar müalicəyə ehtiyac duyub", - deyə qeyd olunur.