Enerji qiymətlərinin kəskin artması fonunda yarım milyondan çox avropalı iş yerini itirə bilər.
Oxu.Az xəbər verir ki, bu barədə "Politico" portalı Avropa Komissiyasının (AK) Avropa İttifaqı (Aİ) ölkələri üçün hazırladığı iqtisadi və siyasi hesabatına istinadən məlumat yayıb.
Hesabatda qeyd olunur ki, ABŞ-İran münaqişəsi fonunda enerji resurslarının bahalaşması 2026-cı ildə 560 minə qədər iş yerini təhlükə altına qoyacaq. Bu böhrandan ən çox tikinti, metallurgiya, kimya sənayesi və nəqliyyat sektorlarının zərər çəkəcəyi proqnozlaşdırılır.
Eyni zamanda, avtomobil sənayesində də vəziyyət olduqca gərgindir. Belə ki, daxiliyanma mühərriklərindən imtina edilməsi və Çindən gələn sərt rəqabət səbəbindən bu sahədə ümumilikdə 600 min iş yeri bağlanmaq riski ilə üz-üzədir.
"Politico"nun məlumatına görə, ixtisarlar alternativ enerji sektorundan da yan keçməyəcək. Yaxın gələcəkdə akkumulyator istehsalı sahəsində daha 85 min, günəş panellərinin istehsalında isə təxminən 59 min iş yerinin ixtisara düşə biləcəyi gözlənilir.
