Banqkokda dağılmış binanın altından 14 cəsəd tapıldı

Banqkokda zəlzələ nəticəsində dağılmış Baş Auditor İdarəsinin 30 mərtəbəli binasının dağıntıları altından 14 cəsəd tapılıb.

Oxu.Az-ın verdiyi məlumata görə, bu barədə "The Nation" qəzeti məlumat verib.

Beləliklə, bu obyektdə təsdiqlənmiş ölüm sayı 29 nəfər olub, daha doqquz nəfər yaralanıb, 59 nəfər isə hələ də itkin düşmüş hesab olunur.

Aşkar edilmiş 14 cəsəddən yalnız birini çıxarmaq mümkün olub, qalanlarının isə gün ərzində çıxarılacağı gözlənilir. Hazırda xilasedicilər işçilərin sağ olduğu ehtimal edilən lift şaxtasına enməyə çalışırlar.

Xatırladaq ki, martın 28-də Myanma ərazisində güclü zəlzələ baş verib. Tailand meteorologiya departamentinin məlumatına görə, onun maqnitudası 7.9 gücündə olub. Zəlzələ qurbanlarının sayı 3000 nəfəri keçib.

Zəlzələdən Tailand da zərər çəkib, güclü təkanlar Banqkok və ətrafında, həmçinin krallığın şimal, şimal-şərq, mərkəzi və cənub bölgələrində hiss edilib. Tailand paytaxtında zəlzələdə ölənlərin sayı 36 nəfərə çatıb. Dağılmış binanın yerində axtarış-xilasetmə əməliyyatı davam edir.