Myanmada uçqun altında iki gün qalan qadının xilası - ANBAAN GÖRÜNTÜLƏR

Myanmada Rusiya Fövqəladə Hallar Nazirliyinin əməkdaşları çinli həmkarları ilə birlikdə zəlzələdən sonra uçqun altında iki gündən çox qalan qadını xilas ediblər.

Oxu.Az-ın məlumatına görə, bu barədə nazirliyin Mətbuat Xidməti "Telegram" kanalında məlumat yayıb.

"Xilasetmə əməliyyatı qaranlıqda səkkiz saat davam edib. Axtarışlar çətin şəraitdə - dağılmış binalarda çoxlu uçqunlar, qeyri-sabit konstruksiyalar və davam edən afterşoklar fonunda aparılır", - deyə FHN-dən bildirilib.

Xatırladaq ki, Myanmada martın 28-də 7.7 maqnitudalı zəlzələ baş verib. Episentri ölkənin ikinci böyük şəhəri olan Mandaleyin qərbində yerləşən təkanları Tailand, Çin və bir sıra qonşu ölkələrin sakinləri də hiss ediblər. Myanmada ölənlərin sayı 1 700 nəfəri keçib.