Birləşmiş Ərəb Əmirlikləri (BƏƏ) İsrailin Baş naziri Benyamin Netanyahunun ölkəyə səfəri və ya hər hansı İsrail hərbi nümayəndə heyətinin qəbul edilməsi ilə bağlı yayılan məlumatları təkzib edib.
Oxu.Az xəbər verir ki, bu barədə ölkənin Xarici İşlər Nazirliyi "X" sosial şəbəkəsindəki rəsmi hesabında paylaşım edib.
"İsraillə münasibətlər məlum və açıq olan "İbrahim razılaşması" çərçivəsində qurulub. Bu əlaqələr gizli və ya məxfi razılaşmalara əsaslanmır. Buna görə də, BƏƏ-nin rəsmi səlahiyyətli qurumları tərəfindən elan edilməyən hər hansı səfər və ya açıqlanmayan razılaşmalar barədə iddiaların heç bir əsası yoxdur", - deyə bəyanatda vurğulanıb.
İsrailin Baş naziri Benyamin Netanyahunun İrana qarşı son hərbi əməliyyatlar fonunda Birləşmiş Ərəb Əmirliklərinə (BƏƏ) gizli səfər etdiyi məlum olub.
Oxu.Az xəbər verir ki, bu barədə İsrail hökumət başçısının dəftərxanası rəsmi məlumat yayıb.
Səfər çərçivəsində Netanyahu BƏƏ Prezidenti Şeyx Məhəmməd bin Zayed Əl Nəhyanla bir araya gəlib. Görüşdə regional təhlükəsizlik və ikitərəfli əməkdaşlıq məsələləri müzakirə olunub.
"Bu səfər İsrail və Birləşmiş Ərəb Əmirlikləri arasındakı münasibətlərdə tarixi bir sıçrayışa səbəb oldu", - deyə dəftərxananın rəsmi bəyanatında vurğulanıb.
