Bosfordan üzüb keçərkən itkin düşmüş üzgüçü Nikolay Sveçnikovun anası Qalina Sveçnikova bildirib ki, tədbirdən videoçəkilişlər aparılsa da, videoyazılar bu günə qədər yoxdur və bu da ciddi əndişələr yaradır.
Oxu.Az xəbər verir ki, o, bunu "RIA Novosti"yə bildirib.
Qadının sözlərinə görə, həmin videoyazılar oğlunun necə yoxa çıxdığına aydınlıq gətirə bilərdi:
"Üzgüçülük yarışının videoyazıları bu günə qədər açıqlanmır və bu da qorxudur. Əgər şahidlər oğlumu startdan 500 kilometr məsafədə birinci körpüyə çatmamış gördüklərini iddia edirlərsə, onda həmin yerin çəkilişi olmalıdır. Əgər səhv etmirəmsə, bu, Sultan Fatih körpüsüdr".
Rusiyalı üzgüçü, məşqçi və idman ustası Nikolay Sveçnikov avqustun 24-də Bosfor boğazında kütləvi üzgüçülük yarışında iştirak edib. 29 yaşlı idmançı finişə gəlməyib. Təşkilatçılar bunu yalnız bir neçə saat sonra öyrəniblər. Polis müəyyən vaxt gözləmək lazım gəldiyini bəhanə gətirərək dərhal axtarışa başlamaqdan imtina edib.
Sonra aydın olub ki, startda xilasedici katerlər olmayıb, iştirakçıların tibbi müayinəsi səthi aparılıb.
