Böyük Britaniya orbitə ilk hərbi kəşfiyyat və müşahidə peykini çıxarıb

Böyük Britaniya Yer səthinin gündüz foto və video çəkilişi üçün nəzərdə tutulmuş ilk hərbi peykini orbitə çıxarıb.

Oxu.Az TASS-a istinadən xəbər verir ki, bu barədə Böyük Britaniya Kosmik Komandanlığının yaydığı məlumatda deyilir.

Qeyd edilir ki, ABŞ-nin "Falcon 9" daşıyıcı aparatı ilə orbitə çıxarılan "Tyche" peyki Böyük Britaniyada hazırlanıb.

Onun hazırlanması və yığılması 22 milyon funt-sterlinqə (25 milyon dollar) başa gəlib. 160 kiloqram çəkisi olan peyk beş kilometr enində, 90 santimetrə qədər aydınlıqda yer cisimlərinin təsvirlərini təqdim etmək üçün nəzərdə tutulub.

"Ukraynadakı münaqişənin göstərdiyi kimi, kosmosdan istifadə hərbi əməliyyatlar üçün vacibdir. 2031-ci ilədək peyk və dəstəkləyici yer sistemləri qrupu yaradılacaq", - Britaniya Kosmik Komandanlığının bəyanatında bildirilir.