Partladılmış "Şimal axını" və "Şimal axını-2" qaz kəmərlərinin operatoruna sığorta ödənişləri ilə bağlı məhkəmə Londonda başa çatıb.
Oxu.Az xəbər verir ki, bu barədə məlumatı "RIA Novosti" dərc edib.
2024-cü ildə "Şimal axını" qaz kəmərlərinin operatoru olan "Nord Stream" şirkəti terror aktlarından sonra dəyən zərəri ödəməkdən imtina etdiklərinə görə "Lloyd's of London" və "Arch Insurance" sığorta şirkətlərini məhkəməyə verib. Söhbət 580 milyon avro (684 milyon dollar) məbləğində ödənişdən gedir.
Məhkəmə prosesi aprel ayında başlayıb və bir neçə həftə uzanıb. İyunun 11-də proses başa çatıb. Məhkəmənin qərarı iyunun 29-dan sonra açıqlanacaq.
İddiaçı tərəfin mövqeyinə əsasən, qaz kəmərləri Ukrayna münaqişəsi zonasından kənarda yerləşir və hər hansı döyüş əməliyyatları planının bir hissəsi deyil, bu isə hadisənin sığorta müqaviləsi ilə əhatə olunan çərçivədən kənara çıxmadığını göstərir. Cavabdeh tərəf isə iddia edir ki, sığortanın şərtləri müharibə nəticəsində və ya hər hansı bir dövlətin əmri ilə vurulan zərəri nəzərdə tutmur. Bununla yanaşı, vəkillər terror aktının arxasında konkret hansı dövlətin durduğunu açıqlamaqdan çəkinirlər.
Xatırladaq ki, "Şimal axını" və "Şimal axını-2" qaz kəmərlərində partlayışlar 2022-ci il sentyabrın 26-da baş verib. Almaniya, Danimarka və İsveç məqsədyönlü diversiya ola biləcəyini ehtimal edib. "Şimal axını"nın operatoru "Nord Stream AG" qaz kəmərlərində dağıntıların miqyaslı olduğunu və təmir müddətlərini qiymətləndirməyin mümkün olmadığını bildirmişdi. Rusiya Baş Prokurorluğu isə hadisəyə dair beynəlxalq terrorizm maddəsi ilə cinayət işi başladıb.
