Braziliyada uzun illər ərzində öz bioloji anasını tapmağa çalışan qadın dəhşətli reallıqla üzləşib - onun əri doğma qardaşı çıxıb.
Oxu.Az-ın xəbərinə görə, bu barədə Böyük Britaniyanın "Mirror" nəşri yazıb.
Məlumata görə, 39 yaşlı Adriana və 37 yaşlı Leandro təxminən iyirmi il ailə kimi yaşayıblar, qızlarını birlikdə böyüdüblər və qan qohumluqlarından xəbərsiz olublar. Hər ikisi anasız böyüyüb və uşaqlıqdan bəri onları dünyaya gətirən Mariya adlı qadınları tapmağa çalışıblar. İllər sonra Adriana kömək üçün "Radio Globo"da yayımlanan məşhur "Zamanı gəldi" verilişinə müraciət etmək qərarına gəlib.
Efir zamanı jurnalistlər Adriana və Leandronun anasının eyni insan olduğunu müəyyən etməyə nail olublar. Bu xəbər cütlük üçün əsl sarsıntı olub. Adriana ailəsini itirməkdən qorxaraq və reallığı dərhal qəbul etməyərək xəbəri ağır şəkildə qarşılayıb.
Mütəxəssislər qeyd edirlər ki, bu cür hallar bəzən erkən yaşda bir-birindən ayrılan qohumlar arasında genetik meyillə əlaqələndirilir.
Şokun böyüklüyünə baxmayaraq, ər-arvad bu qənaətə gəliblər ki, ayrılmağa hazır deyillər. Onlar münasibətlərini davam etdirməyə qərar veriblər və vurğulayıblar ki, baş verənlərə görə analarının günahkar olduğunu hesab etmirlər.
Sirrin açılmasından sonra cütlük bir neçə dəfə anası ilə telefonla danışıb, həmçinin onlar keçmişi araşdırmaq və hər şeyi birdəfəlik aydınlaşdırmaq üçün anaları ilə şəxsən görüşmək niyyətindədirlər.
