Cənubi Koreya kosmik kəşfiyyat sahəsində yeni bir addım ataraq dördüncü casus peykini uğurla orbitə çıxardıb. Bu gün Florida ştatının Kanaveral burnundakı ABŞ Kosmik Qüvvələri bazasından "SpaceX" şirkətinin "Falcon 9" raketi ilə start götürən peyk hədəf orbitinə çatıb.
Oxu.Az-ın məlumatına görə, bu barədə Koreya Respublikasının Müdafiə Nazirliyi xəbər yayıb.
Bildirilir ki, bu buraxılış ölkənin öz casus peyk qrupunu yaratmaq üçün həyata keçirdiyi iddialı proqramın bir hissəsidir.
2025-ci ilin sonuna qədər daha bir peyk orbitə göndəriləcək və beləliklə, Cənubi Koreya şimal qonşusu olan KXDR-i cəmi iki saatlıq intervallarla fasiləsiz olaraq müşahidə edə biləcək.
Qeyd edək ki, Cənubi Koreyanın ilk kəşfiyyat peyki 2023-cü ilin dekabrında orbitə buraxılmışdı. Ölkə üçün kosmik kəşfiyyat imkanlarının inkişafı strateji əhəmiyyət daşıyır. Bu, Cənubi Koreyanın ABŞ-nin təqdim etdiyi kəşfiyyat məlumatlarından asılılığını azaltmağa imkan verəcək.
Xüsusilə, KXDR-in ilk "Malligyong-1" kəşfiyyat peykini orbitə çıxarması bu məsələni daha da aktuallaşdırıb. Cənubi Koreya isə kosmik yarışda geri qalmamaq və təhlükəsizliyini təmin etmək üçün öz kəşfiyyat peyklərinin sayını artırmağa davam edir.
