Xəbər agentliklərinin fotoqraflarının geridə qoymağa hazırlaşdığımız il ərzində dünyanın müxtəlif yerlərində çəkdikləri ən parlaq və yaddaqalan fotolar ənənəvi olaraq dekabrın son günlərində cəmlənərək oxuculara təqdim olunur.
Ötən ilə damğa vuran hadisələrin fotodaycestini təqdim edirik:
Fransada bir milyondan çox insan pensiya yaşının 62-dən 64-ə qaldırılması planlarına qarşı keçirilən etiraz aksiyalarına və tətillərə qatılıb. Təxminən 80 min etirazçı Paris küçələrinə çıxıb, nümayişlər, həmçinin, Fransanın daha 200 şəhərində keçirilib.
Keçmiş Papa XVI Benediktin Vatikandakı Müqəddəs Pyotr kilsəsində dəfn mərasimi zamanı minlərlə insan ona ehtiramını ifadə edib. O, səhhəti ilə əlaqədar təqaüdə çıxdıqdan təxminən on il sonra, 95 yaşında Yeni il gecəsi vəfat edib.
Braziliyanın San-Paulu şəhəri yaxınlığındakı sahilyanı əraziyə rekord həcmdə yağan yağışlar nəticəsində 750-dən çox insan evini itirib, 40-dan çox insan həlak olub.
Fevral ayında Türkiyənin cənub-şərqində, Suriya sərhədi yaxınlığında baş verən güclü zəlzələdə onminlərlə insan həlak olub, onminlərlə sakin yaralanıb. Fotoda Hatayda dağılmış binalar arasında tək gəzən qadın əks olunub.
Mişel Yeo ən yaxşı qadın roluna görə mükafat alan ilk asiyalı qadın olub, “Hər şey, hər yerdə və dərhal” filmi “Oskar” mükafatlandırma mərasimində üstünlük qazanıb. Multikainat barədə macəra filmi ən yaxşı film, rejissor və orijinal ssenari də daxil olmaqla yeddi nominasiyada mükafat qazanıb. Yeonun həmkarları Ke Hay Syan və Ceymi Li Körtis ikinci dərəcəli aktyor və aktrisa kateqoriyalarında qalib olublar.
71 yaşlı Lyubov Vasilyevna bütün gücü ilə izah etməyə çalışır ki, niyə öz evində qalmaq istəyir və Ukraynanın şərqindəki Donetsk vilayətinin Avdeyevka şəhəri yaxınlığında yerləşən Semyonovka kəndindən təxliyə edilmək istəmir. 2022-ci ilin fevralında Rusiyanın Ukraynaya hərbi müdaxiləyə başladığı vaxtdan həm Kiyev, həm də Moskva bir-birini Cenevrə Konvensiyalarını pozmaqda ittiham edirlər.
Hindistanın Mumbay şəhərindəki Appa Pada gecəqondularında baş verən yanğından sonra əmələ gələn tüstü dumanı. Yanğın nəticəsində mindən çox evə ziyan dəyib və ya dağılıb.
Boliviyanın La-Pas şəhərində müəllimlərin Boliviya Təhsil Nazirliyinin təyin etdiyi yeni kurrikuluma etirazları zamanı polis əməkdaşları qırmızı boya atılmış qalxanlarla keşik çəkirlər.
ABŞ-nin keçmiş prezidenti Donald Tramp “susqunluq müqabilində pul ödəmələri” iddiası ilə bağlı məhkəmədə çıxışından sonra Florida ştatının Palm-Biç şəhərindəki Mar-a-Laqo malikanəsində keçirilən mətbuat konfransını tərk edir. Tramp Manhetten məhkəmə zalında iş sənədlərinin saxtalaşdırılması ilə bağlı 34 ittiham bəndi üzrə özünü günahkar hesab etməyib, lakin hələ hakim qarşısına çıxarılmayıb.
İtaliyanın Neapol şəhərinin komandası 33 ildə ilk dəfə A Seriyasında futbol titulunu qazandıqdan sonra azarkeşlər küçələrə çıxaraq mahnı oxuyub, rəqs edib və bir-birlərini qucaqlayıblar.
Kral III Çarlz və Kraliça Kamilla İngiltərə paytaxtı Londonda tacqoyma mərasimindən sonra Bukingem sarayının eyvanında dayanıblar. Çarlz 8 sentyabr 2022-ci ildə anası Kraliça II Elizabetin ölümündən sonra kral olub.
Ruzvelt adasında tramvay İst-River çayını keçərkən insanlar maska taxıblar, çünki Kanadadakı meşə yanğınları nəticəsində yaranan duman və tüstü Manhetten üfüqlərinə yayılıb. Nyu-Yorkun Kvins qəsəbəsindən görüntü.
Kolumbiya Hərbi Hava Qüvvələrinin əməkdaşları Kolumbiya cəngəlliyində təyyarə qəzasında sağ qalan uşaqlara yardım ediblər. Mayın 1-də təyyarənin qəzaya uğramasından sonra yerli əhalidən olan dörd uşaq itkin düşüb və onların tapılması üçün geniş axtarış əməliyyatına başlanılıb. Qırx gün sonra qışqırıq səsləri eşidilib və 13, doqquz, beş və bir yaşlarında olan uşaqlar tapılıblar. Dördü də zəifləmiş və bədənləri susuzlaşmış olmalarına baxmayaraq, sağ qalıb.
Almaniyanın Kil şəhərində yerləşən Geomar elmi-tədqiqat institutunun alimi Ancela Stivenson Almaniyanın Laboe bölgəsindəki sualtı “çəmənlik”də dəniz otlarını toplayır.
Hakim Vinsent Holian İrlandiyanın Qoluey qraflığında yerləşən “Roundstone Connemara” poni sərgisində bir yaşında olan madyanı izləyir.
Avstraliyalı sörfçü qadın Oliviya Ottauey Fransız Polineziyasının Teaxupo şəhərində sulara baş vurur. Kənd iyirmi ildən artıqdır ki, Dünya Sörf Liqasının Tahiti Pro yarışını keçirir və gələn il Parisdə keçiriləcək 2024-cü il Olimpiya Oyunlarında sörfinqə ev sahibliyi edəcək.
Xonay Ravelo özünün “Nivariya” atı üzərində oturub və 31 avqust tarixində İspaniyanın cənubunda Qran-Kanariyadakı Moqan dağından “Mavi Ay” kimi tanınan “Super Ay”ı seyr edir.
Yanğınsöndürənlər İndoneziyanın Cənubi Sumatra əyalətinin Oqan İlir bölgəsində yanmış torf sahələri və tarlalarda meşə yanğınını söndürməyə çalışırlar. Ölkənin ən azı altı əyaləti kənd təsərrüfatı plantasiyaları üçün qeyri-qanuni şəkildə qalanan ocaqların törətdiyi meşə yanğınları ilə mübarizə aparmalı olub.
Miqrantlar ABŞ-nin San-Dieqo şəhərində Meksika ilə ABŞ arasındakı əsas və əlavə sərhəd hasarları arasında toplaşıblar və ABŞ immiqrasiya xidmətinin əməkdaşları tərəfindən yoxlamaların aparılmasını, eyni zamanda humanitar yardım işçilərindən yemək gözləyirlər.
Əfqanlar Heratda baş verən 6,3 bal gücündə zəlzələdən sonra dağıntılar üzərində toplaşıblar. Əfqanıstanın qərbində dörd gün ara ilə iki güclü zəlzələ baş verib və nəticədə 1 300-dən çox insan həlak olub. Birləşmiş Millətlər Təşkilatı onilliklər boyu davam edən müharibədən sonra hələ də özünə gəlməyən bir ölkə üçün bunu “fəlakətin zirvəsindəki fəlakət” adlandırıblar.
İsrailin Nir Oz kibbutsundan olan və uşaqları girov götürülən Xadas Kalderon qardaşı qızı ilə birlikdə öldürülən anası Rina Suskeverin yanmış evinə baxır və ağlayır. Oktyabrın 7-də HƏMAS döyüşçüləri Qəzza zolağından İsrailə misligörünməmiş hücuma keçib, 1 200 nəfəri qətlə yetirib, 240-a yaxın insanı girov götürüb.
İsrailin “Dəmir günbəz” raketdən müdafiə sistemi Qəzza zolağından atılan raketlərin qarşısını alır.
Fələstinli qadın İnas Əbu Maamar Qəzza zolağının cənubunda yerləşən Xan-Yunisdəki Naser xəstəxanasında İsrailin hücumu nəticəsində öldürülən beş yaşlı qardaşı qızı Salinin cəsədini qucaqlayıb.
Maori Yeni Zelandiya, Kraystçerç şəhərinin Nyu-Brayton rayonunda sahilə çıxmış balinaya ehtiram bildirmək üçün karakiya (tilsimlər və dualar) ayinini həyata keçirir.
Filippinin keçmiş prezidenti Rodriqo Dutertenin aparıcı tənqidçisi narkotiklərə qarşı qanlı müharibəsi ilə bağlı ittihamlar üzrə yeddi ilə yaxın həbsdən sonra zaminə buraxılıb. Keçmiş senator Leyla de Lima narkotik satışından əldə edilən pulu almaqda ittiham olunur və bunun siyasi motivli iş olduğunu iddia edir.
İslandiyanın zəlzələ nəticəsində dağılmış Qrindavik şəhərində nəhəng çatlar əmələ gəlib. Səlahiyyətlilər vulkanın tezliklə püskürəcəyindən ehtiyat etdikləri üçün minlərlə insan təxliyə olunub.
Çilinin Pukon şəhərində qarla örtülmüş Villarrika şəhərinin üzərindən tüstü dumanı yüksəlir. Cənubi Amerikanın ən aktiv vulkanlarından biri olan və 2 847 metr yüksəklikdə yerləşən vulkan sonuncu dəfə 2015-ci ildə püskürüb.
Rəqqasələr Polin Okumu və Natalya Komo Nayrobidəki Keniya Milli Teatrında klassik “Şelkunçik” baletinin bayram nümayişi zamanı səhnə arxasında qucaqlaşırlar.
Mənbə: BBC.com
Rəylər