Ermənistan-ABŞ tərəfdaşlıq sazişi nə deməkdir? - Ekspertlərdən İZAH

Yanvarın 14-də Ermənistan və ABŞ strateji tərəfdaşlıq sazişi imzalayacaqlar.

Oxu.Az xəbər verir ki, ekspertlər NEWS.ru-ya bu razılaşmanın Ermənistan hakimiyyətinə nə üçün lazım olduğunu, Vaşinqtondan nə gözlədiklərini, hansı risklər daşıdığını açıqlayıblar.

Rusiya Federasiya Şurasının Beynəlxalq Əlaqələr Komitəsinin sədri Qriqori Karasin müqavilənin imzalanması ilə bağlı xəbərlərin maraqlı xarakter daşıdığı qənaətində olduğunu bildirib.

"Çünki KTMT-nin, Avrasiya İqtisadi İttifaqının üzvü, bizim çoxillik qonşumuz Vaşinqtonla tərəfdaşlıq sazişi imzalayır. Ona görə də, fövqəltəbii heç nəyi proqnozlaşdırmayacağam. Amma biz bu sənədin tam olaraq nəyi əhatə etdiyini diqqətlə izləyəcəyik. Əgər bunun ardınca Rusiya Federasiyasının, bütün Avrasiya birliyinin milli maraqlarına zidd olan hərəkətlər baş verərsə, o zaman çox konkret nəticələr çıxarılacaq", - senator bildirib.

Dövlət Dumasının beynəlxalq məsələlər komitəsinin sədr müavini Aleksey Çepa isə bəyan edib ki, Ermənistan ABŞ ilə strateji tərəfdaşlıq sazişinin mahiyyətini izah etməlidir. Parlamentarinin fikrincə, bu sənəd respublikanın Rusiya ilə gələcək münasibətlərində iz qoyacaq.

Çepanın qeyd etdiyi kimi, Ermənistan Ukrayna münaqişəsini alovlandırmaq üçün bütün səylərini əsirgəməyən bir ölkə ilə strateji tərəfdaşlığa qədəm qoyur.

"Bu gün ABŞ-ni strateji tərəfdaş hesab edirlərsə, həmin strateji tərəfdaş Rusiya ilə Ukrayna arasında münaqişənin başlanması üçün hər şeyi edib və hazırda Kiyevi hər cür dəstəkləyir. O cümlədən cənab Blinken. Bu bizim Ermənistanla gələcək əməkdaşlığımızın perspektivlərində müəyyən iz buraxır", - Çepa yekunlaşdırıb.

Kollektiv Təhlükəsizlik Müqaviləsi Təşkilatının (KTMT) baş katibi İmanqali Tasmaqambetov vurğulayıb ki, ABŞ və Ermənistan arasında tərəfdaşlıq ölkələrin suveren hüququdur, lakin digər dövlətlərin təhlükəsizliyini təhdid etməməlidir.

"Hər iki tərəfin (Ermənistan və ABŞ) bərabər və bölünməz təhlükəsizlik prinsipindən çıxış etməsi vacibdir, yəni bu tərəfdaşlıq digər dövlətlər və beynəlxalq birliklər üçün təhlükəsizlik təhdidləri yaratmamalıdır", - Tasmaqambetov deyib.

"Avropa və ABŞ-də konfiqurasiya dəyişir. Trampın qələbəsi Vaşinqtonda təcridçilik meyllərinin güclənməsindən xəbər verir. Bundan başqa, Paşinyan Corc Sorosun himayəsi altındadır və Soros Trampın birbaşa, şəxsi düşmənidir. Avropa İttifaqına gəlincə, onun indi geosiyasi eksperimentlər üçün resursları azdır, hətta uzun müddət Cənubi Qafqazın işlərinə qarışan Fransanın da", - politoloq Dmitri Solonnikov qeyd edib.

Rusiyanın Xarici və Müdafiə Siyasəti Şurasının Rəyasət Heyətinin sədri Fyodor Lukyanovun sözlərinə görə, Ermənistan rəhbərliyi son vaxtlar Rusiyadan uzaqlaşaraq xarici siyasətini şaxələndirməyə çalışır, lakin bu, respublika üçün heç bir real müsbət nəticə vermir.

"Tezliklə aydın oldu ki, prinsipcə, sözdə tarazlıq qurmaq olar, lakin Ermənistanın Qərbə yönləndirməsini həyata keçirmək üçün istənilən praktiki addımlar çox ciddi itkilərlə nəticələnəcək", - politoloq qeyd edib. O xatırladıb ki, bir gün əvvəl Ermənistanın iqtisadiyyat naziri Gevork Papoyan Avrasiya İqtisadi İttifaqından (Aİİ) çıxmağın İrəvanın gündəmində olmadığını etiraf edib.

Buna görə də, Lukyanov əmindir ki, Ermənistan hakimiyyəti reallıqda az effektli xarici siyasət yürüdür.

"Çünki reallıqda yeni institusional tərəfdaşlar yoxdur - Ermənistan hara, Aİ və hətta NATO hara, daha doğrusu, NATO yaxınlıqdadır. Amma ünvan Türkiyədir. Əgər Ermənistan Türkiyə ilə sıx əməkdaşlığa və inteqrasiyaya doğru irəliləməyə hazırdırsa, bu anlaşılandır. Amma burada mənə elə gəlir ki, onların daxili problemləri olacaq. Ona görə də, indi sözlər, bəyanatlar eşidilir, xüsusən də siyasi və hərbi-siyasi müstəvidə, iqtisadi səviyyədə hər şey olduğu kimi qalır. Ölkənin iqtisadi inkişafına cavabdeh olanlar isə kəskin addımların atılmamasında son dərəcə maraqlıdırlar. Məncə, sözlərdən başqa hələ heç nə yoxdur", - Lukyanov vurğulayıb.