Husilərin lideri Abdul-Malik əl-Husi bildirib ki, onların "Ənsar Allah" qruplaşması zərurət yaranacağı halda regionda döyüş əməliyyatlarına qoşulmağa hazırdır.
Oxu.Az xəbər verir ki, bu barədə "Al Jazeera" məlumat yayıb.
"Vəziyyətin ən kiçik inkişafı hərbi cavab tələb edərsə, əvvəlki mərhələlərdə olduğu kimi, biz tərəddüdsüz müdaxilə edəcəyik", - deyə o qeyd edib.
Fevralın 25-də İranın "Tasnim" agentliyi bildirib ki, yeni hücumlar baş verəcəyi təqdirdə İran dünya ticarəti üçün mühüm əhəmiyyət kəsb edən Bab əl-Məndəb boğazında gəmiçiliyə təhlükə yarada bilər. ABŞ Nəqliyyat Nazirliyi isə husilərin bu boğazda hücumları bərpa edə biləcəyi ilə bağlı xəbərdarlıq edib.
"2025-ci ilin oktyabrında İsrail ilə HƏMAS arasında əldə olunan atəşkəs razılaşmasından sonra husi qruplaşması kommersiya gəmilərinə hücum etməsə də, onlar regionda ABŞ aktivləri, o cümlədən ticarət gəmiləri üçün hələ də təhlükə yaradır", - deyə bəyanatda bildirilir.
Agentlik xatırladır ki, bu boğaz vasitəsilə Səudiyyə Ərəbistanı nefti Qırmızı dənizdə yerləşən Yanbu əl-Bahr limanında tankerlərə yüklənərək daşınır və bununla da Hörmüz boğazının mümkün blokadasından yan keçilir.
