Britaniyalı restoran sahibi İngiltərənin romantik məkanlarından biri hesab edilən və şair Uilyam Vordsvortun adı ilə bağlı olan Qrasmir kəndində gecə-gündüz fəaliyyət göstərəcək kababxana açmaq planına görə yerli sakinlərin etirazı ilə üzləşib.
Oxu.Az xəbər verir ki, bu barədə "The Sun" nəşri məlumat yayıb.
Məlumata görə, sakinlər ənənəvi kənd kafesinin kababxanaya çevrilməsinə və müəssisənin sutka ərzində 24 saat fəaliyyət göstərməsinə qarşı çıxıblar.
Mübahisə restoran sahibi Şvan Hderin "Goody Blakes" adlı kiçik kafeni isti yeməklərin satıldığı məkana çevirmək üçün bələdiyyəyə rəsmi müraciət etməsindən sonra başlayıb. Sahibkar obyekti "Grasmere Kebab Shop" adı ilə fəaliyyətə başlatmağı planlaşdırırdı.
Kənd şurası sakinlərin çoxsaylı etirazları və petisiyalarından sonra restoran sahibinin müraciətinin rədd edilməsini yekdilliklə dəstəkləyib. Şura layihənin Leyk-Distrikt Milli Parkının ekosistemi üçün təhlükə yarada biləcəyini bildirib.
Qrasmirdə fəaliyyət göstərən ekoloji və tarixi irsin qorunması üzrə fəallar da layihəyə qarşı bir sıra arqumentlər irəli sürüblər. Onların fikrincə, fastfud məntəqəsi qədim küçələrdə daimi tüstü və yağ qoxusunun yaranmasına səbəb olacaq.
Bundan əlavə, obyekt ibtidai məktəbdən cəmi 100 metr məsafədə yerləşir. Bu isə Böyük Britaniyada məktəblərin yaxınlığında zərərli qida satışı məntəqələrinin fəaliyyətini məhdudlaşdıran sanitariya və sosial normalara zidd hesab olunur.
Sakinlər həmçinin gecə saatlarında avtomobil hərəkətinin artacağından və birdəfəlik qablaşdırmalardan yaranacaq plastik tullantıların çoxalacağından narahat olduqlarını bildiriblər.
İctimai təzyiqlərdən sonra şura lisenziyanın verilməsi prosesini rəsmi olaraq dayandırıb. Lakin restoran sahibi ona qarşı səsləndirilən tənqidləri "inanılmaz və qərəzli" adlandırıb.
O bildirib ki, kommersiya planlarından imtina etmək niyyətində deyil və hazırda həm apellyasiya şikayəti hazırlayır, həm də yenidən təqdim etmək üçün layihəyə dəyişikliklər edir.
