İran ABŞ ilə münaqişənin nizamlanmasına dair mümkün saziş çərçivəsində Hörmüz boğazından keçən gəmilərdən rüsum almamağa razılaşıb.
Oxu.Az xəbər verir ki, bu barədə "Fox News" telekanalı ABŞ administrasiyasının yüksəkvəzifəli rəsmisinə istinadən məlumat yayıb.
"İran strateji boğazı açacaq və oradan keçən gəmilərdən heç bir ödəniş tələb olunmayacaq", - deyə rəsmi telekanalın efirində bildirib.
Məlumata görə, saziş imzalanacağı təqdirdə ABŞ tətbiq etdiyi blokadanı aradan qaldıracaq, İran isə Hörmüz boğazını gəmiçilik üçün açacaq. Bundan sonra boğazın sularının minalardan təmizlənməsinə başlanılacaq.
Xatırladaq ki, iyunun 13-də ABŞ Prezidenti Donald Tramp Vaşinqton və Tehran arasında sazişin iyunun 14-də imzalana biləcəyini bəyan etmişdi. Ağ Ev rəhbərinin sözlərinə görə, sazişdən sonra Hörmüz boğazı bütün ölkələrin gəmiləri üçün açıq olacaq.
