"Hizbullah"ın İran qolunun baş katibi Məhəmmədbağır Xərrazinin son açıqlamaları ölkədə müzakirələrə səbəb olub.
Bu barədə "Azad İran" "Telegram" kanalı xəbər verir.
Öz çıxışında Xərrazi İranın hazırkı Ali Lideri Müctəba Xameneinin 3 il əvvəl atasının ofisindəki işindən uzaqlaşdırılmasından danışıb və bildirib ki, əgər o bu vəzifədə qalsaydı, onu öldürmək istəyən insanlar olacaqdı. Məhəmmədbağır Xərrazi vurğulayıb ki, ilk dəfədir bu barədə danışır.
Daha sonra radikal din xadimi bəyan edib ki, Əli Xameneinin sağlığında bəzi insanlar ona da ölüm arzulayırdılar.
Xərrazi, həmçinin İranın keçmiş prezidenti İbrahim Rəisinin ölümü ilə bağlı da qalmaqallı açıqlama verib. Onun sözlərinə görə, Rəisi İranın ali lideri olmaq niyyəti yarandıqdan sonra aradan götürülüb.
O, açıqlamalarına davam edərək, həmçinin İslam Respublikasının qurucusu ayətullah Xomeyninin ofisinə, eləcə də bəzi siyasi xadimlərə qarşı da ittihamlar səsləndirib.
