"Mən inanıram ki, hər iki komanda üçün həyəcanlı oyun keçəcək".
Oxu.Az xəbər verir ki, bunu UEFA Çempionlar Liqasının III təsnifat mərhələsində keçiriləcək "Sabah" - "Orhus" oyunundan əvvəl mətbuat konfransında Abşeron təmsilçisinin baş məşqçisi Valdas Dambrauskas deyib.
O bildirib ki, bir qol fərqi elə də böyük fərq deyil:
"Biz ev komandasıyıq. Doğma azarkeşlərin önündə, doğma meydanda çıxış edəcəyik. Bütün futbolçular görüşə tam hazırdır. Klub olaraq hamımızın tək məqsədimiz sabahkı oyunda sərfəli nəticə əldə edib növbəti mərhələyə vəsiqə qazanmaqdır".
Baş məşqçi ilk oyun barədə də danışıb:
"Rəqibimizin çox yaxşı komandası var. Biz məğlubiyyətə baxmayaraq, ilk oyunda çox yaxşı çıxış etdik. Amma rəqibin azarkeşləri möhtəşəm atmosfer yaratmışdı və futbolçular çox motivasiyalı idilər. Əlbəttə nəticə bizim üçün yaxşı ola bilərdi. Rəqib çox qol fürsəti yaratmasa da, az epizodlardan yaxşı yararlana bilirlər".
Xatırladaq ki, komandalar arasında Danimarkada keçirilən ilk qarşılaşma "Orhus"un 2:1 hesablı qələbəsi ilə başa çatıb.
Qeyd edək ki, "Bank Respublika Arena"da keçiriləcək matç sabah saat 20:00-da start götürəcək.
