İran dövlət televiziyası öz vətəndaşlarını telefonlarından "WhatsApp" tətbiqini silməyə çağırıb.
Oxu.Az-ın xəbərinə görə, bu barədə "TRT News" məlumat verib.
Məlumata görə, səlahiyyətlilər bununla bağlı hər hansı konkret sübut təqdim etməyiblər, amma tətbiqin istifadəçi məlumatlarını toplayaraq İsrailə göndərdiyini iddia ediblər.
"WhatsApp" isə yaydığı bəyanatda bu ittihamların əsassız olduğunu deyib.
"Biz bu cür yalan məlumatların xidmətlərimizi bloklamaq üçün bəhanə kimi istifadə olunacağından narahatıq", - deyə şirkətdən bildirilib.
"WhatsApp" mesajların başdan-başa şifrələndiyini və şirkətin məzmuna çıxışının olmadığını vurğulayıb.
"Biz istifadəçilərin olduğu yerləri izləmirik, mesajların mətninə çıxışımız yoxdur və hökumətlərə məlumatlar məcmusu ötürmürük", - deyə qeyd edilib.
Kornell Universitetinin kibertəhlükəsizlik üzrə eksperti Qreqori Falkonun sözlərinə görə, mesajın məzmunun məxfi qalmasına baxmayaraq, "WhatsApp" üzərindən göndərilən bəzi metaməlumatlar şifrələnmir. Falko bu məlumatlar vasitəsilə istifadəçi davranışının qismən izlənilə biləcəyini söyləyib. Həmçinin "WhatsApp" məlumatlarının İran xaricindəki serverlərdə saxlanması səbəbilə məlumatların suverenliyi məsələsinin əhəmiyyət kəsb etdiyini dilə gətirib.
Xatırladaq ki, İran daha əvvəl də bir çox sosial media platformalarını qadağan etmişdi. Lakin əhali "VPN" və "Proxy" kimi üsullarla bu maneələri aşmağa davam edirlər. 2022-ci ildə ölkə daxilində başlayan etirazlar zamanı "WhatsApp" və "Google Play"ə giriş bağlanmış və bu qadağalar 2024-cü ilin sonunda aradan qaldırılmışdı.
"WhatsApp" İranda "Instagram" və "Telegram" ilə birlikdə ən çox istifadə edilən mesajlaşma proqramlarından biri kimi seçilir. Səlahiyyətlilərin son xəbərdarlığından sonra tətbiqin yenidən bloklanacağı ilə bağlı isə hələlik dəqiq məlumat yoxdur.
