Ötən gecə İran tərəfindən İordaniya ərazisinə genişmiqyaslı raket hücumu həyata keçirilib. İslam İnqilabı Keşikçiləri Korpusunun (SEPAH) yaydığı bəyanata əsasən, Birləşmiş Ştatların istifadəsində olan "Müvəffəq-Səlti" və "Şahzadə Həsən" hərbi aviabazaları hədəfə alınıb.
Oxu.Az xəbər verir ki, bu barədə SEPAH-ın mətbuat xidmətinin açıqlamasında qeyd olunur.
Bildirilir ki, ABŞ-yə məxsus "Patriot" hava hücumundan müdafiə sistemləri raketlərin qarşısını effektiv şəkildə ala bilməyib və bu səbəbdən İordaniya Silahlı Qüvvələrinin qırıcıları havaya qalxmağa məcbur olub.
Qurum həmçinin adını açıqlamadığı ərəb kütləvi informasiya vasitələrinə istinadən, xəsarət alan çox sayda ABŞ-li hərbçinin Almaniyadakı "Ramştayn" bazasına təxliyə edildiyini iddia edib.
SEPAH rəsmiləri bu hücumun ABŞ qoşunlarının İranın neft tankerlərinə etdiyi hücuma cavab olaraq gerçəkləşdirildiyini vurğulayıblar. Eyni zamanda, SEPAH donanmasının Hörmüz boğazı yaxınlığında 20 gəmiyə hücum etməsi də rəsmi Tehran tərəfindən aqressiyaya qarşı atılan addım kimi qiymətləndirilib. ABŞ rəsmiləri isə hələlik bu iddialarla bağlı heç bir şərh verməyiblər.
