İrəvanda prezident iqamətgahının yanında GÜCLÜ PARTLAYIŞ

İrəvanın mərkəzində partlayışın səbəbi Dövlət Nəzarət Xidməti binası və Ermənistan prezidentinin iqamətgahının yaxınlığında baş verən ciddi yol-nəqliyyat hadisəsi olub.

Oxu.Az bu barədə yerli KİV-lərə istinadən məlumat verir.

Məlumata görə, qəza nəticəsində dörd nəqliyyat vasitəsi - üç minik avtomobili və bir betonqarışdırıcı yük maşını toqquşub. Zərbənin gücündən yük maşını aşıb və hadisəyə cəlb olunan bütün nəqliyyat vasitələri alışaraq yanıb.

Hadisə şahidlərinin sözlərinə görə, yanğından öncə güclü partlayış səsləri eşidilib. Əraziyə dərhal dörd yanğınsöndürmə briqadası cəlb olunub və alovun söndürülməsi istiqamətində tədbirlər görülüb.

Hazırda zərərçəkənlər və qəzanın səbəbləri barədə məlumat dəqiqləşdirilir. Ermənistan hüquq-mühafizə orqanları hadisənin başvermə şəraitini araşdırmağa başlayıb.

16:38

Ermənistanın paytaxtı İrəvanda Dövlət Nəzarət Xidmətinin binası yaxınlığında yanğın hadisəsi qeydə alınıb.

Oxu.Az-ın yerli mediaya istinadla məlumatına görə, yanğından əvvəl partlayış səsləri eşidilib.

Hadisə yerinə yanğından mühafizə qüvvələri cəlb olunublar.

Hadisə ilə bağlı əlavə məlumat verilməyib. İnsidentin səbəbləri və mümkün xəsarət alanlar barədə rəsmi açıqlama gözlənilir.

İrəvanda prezident iqamətgahının yanında GÜCLÜ PARTLAYIŞ