İran öz energetika infrastrukturuna endirilən zərbələrə cavab olaraq, İsrailin Hayfa şəhərində yerləşən strateji obyektlərə hücum təşkil edib.
Oxu.Az SNN telekanalına istinadən xəbər verir ki, zərbələr nəticəsində şəhərdəki elektrik stansiyası və neft emalı zavodu hədəf alınıb.
Telekanalın iddiasına əsasən, hücumdan sonra sözügedən hər iki obyektdə güclü yanğın başlayıb.
İslam İnqilabı Keşikçiləri Korpusu (SEPAH) İsraildəki bir neçə strateji əhəmiyyətli hədəfə zərbələr endirdiyini elan edib.
Oxu.Az xəbər verir ki, bu barədə "Tasnim" agentliyi məlumat verib.
"Bunlara İsrail rejiminin əsas qoşun cəmləşməsi və logistika dəstəyi mərkəzi olan Ben Qurion hava limanı, yanacaq təchizatı müəssisələri və digər strateji obyektlər, eləcə də Hayfadakı İsrail ordusunun mövqeləri, "Hayfa" və "Rişon Le-Zion" neft emalı zavodları daxildir", - deyə açıqlamada qeyd olunub.
Bundan başqa əməliyyatda "Qədr", "Emad", "Heybərşəhr" və "Xorrəmşəhr" raketlərindən istifadə edildiyi bildirilib.
İran ABŞ və İsrailə qarşı hərbi əməliyyatının 64-cü mərhələsində İsrail Milli Təhlükəsizlik Nazirliyinə və Təl-Əvivdə yerləşən "Chanel 13" televiziyasına zərbələr endirib.
Oxu.Az xəbər verir ki, bu barədə İran ordusunun mətbuat xidməti açıqlama yayıb.
"Əl-Aləm" televiziya kanalının açıqlamasına görə, İran İsrail quru qüvvələri ilə əlaqəli hədəflərə də hücum edib.
İsrail ordusu (SAXAL) növbəti dəfə İrandan raket buraxılışının həyata keçirildiyini və onların zərərsizləşdirilməsinə başlanıldığını bildirib.
Oxu.Az xəbər verir ki, bu barədə SAXAL-ın "Telegram" kanalında bəyanat yayımlanıb.
"İsrail Müdafiə Qüvvələri İrandan ölkə ərazisinə doğru atılan raketləri aşkar edib. Müdafiə sistemləri təhdidlərin qarşısını almaq üçün çalışır", - deyə bəyanatda qeyd olunub.
Xatırladaq ki, İsrail ordusu sonuncu dəfə İrandan raket atəşini Bakı vaxtı ilə saat 12:49-da aşkar edib.
İsrail Müdafiə Qüvvələri (SAXAL) İrandan raket buraxılışı ilə bağlı 24 saat ərzində üçüncü dəfə xəbərdarlıq edib.
Oxu.Az xəbər verir ki, bu barədə İsrail ordusu "Telegram" kanalında məlumat verib. Bildirilib ki, SAXAL raketləri zərərsizləşdirir.
"Ynet" portalının məlumatına görə, İsrailin şimalında sirenlər səslənib. "Bu, üç saatdan az müddətdə üçüncü xəbərdarlıqdır. Birinci xəbərdarlıq Bakı vaxtı ilə saat 05:12-də, raketlər İsrailin mərkəzinə doğru uçarkən edilib. Raket buraxılışlarının ikinci dalğası zamanı İsrailin şimalında sirenlər səslənib", - deyə məlumatda qeyd olunub.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
