İsrail Hərbi Hava Qüvvələri İrana hücumlar zamanı Xəzər dənizi sahilləri yaxınlığında yerləşən hava hücumundan müdafiə sistemlərinə zərbələr endirib.
Oxu.Az bildirir ki, bu barədə İsrail ordusunun mətbuat xidməti məlumat yayıb.
Qeyd olunub ki, bu hədəflər əsasən İranın şimalında - Xəzər dənizi yaxınlığındakı meşəlik ərazidə yerləşir.
Obyektlərin İsrail ərazisindən 1 600 kilometr məsafədə yerləşdiyi vurğulanır.
Son iki gündə İsrail Hərbi Hava Qüvvələri Tehran bölgəsində silahların hazırlanması və istehsalı ilə əlaqəli təxminən 40 obyektə hücum edib.
Oxu.Az xəbər verir ki, bu barədə İsrail ordusunun mətbuat xidməti məlumat yayıb.
Bildirilib ki, bu hava hücumları zamanı 80-dən artıq sursat istifadə edilib. Hücuma məruz qalan hədəflər arasında yer-hava raketlərinin yığılması zavodu, tank əleyhinə raket hissələri fabriki və ballistik raket mühərriklərinin istehsal edildiyi müəssisə də var.
İsrail ordusu İranın paytaxtı istiqamətində kütləvi hava zərbələrinə başladığını elan edib.
Oxu.Az xəbər verir ki, bu barədə SAXAL məlumat yayıb.
"İsrail ordusu Tehran ərazisindəki hərbi infrastruktur obyektlərini hədəfə alır", - deyə İsrail Silahlı Qüvvələrinin mətbuat xidməti tərəfindən yayılan bəyanatda qeyd olunur.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
