İsrail iki gündə 20-dən çox iranlı komandiri öldürüb

İsrail Müdafiə Ordusu (SAXAL) İrana hücumlara başladığı gündən indiyə kimi 20 iranlı komandiri məhv edib.

Oxu.Az bu barədə SAXAL-ın "Telegram" kanalına istinadla xəbər verir. Bildirilir ki, öldürülənlər arasında kəşfiyyat idarəsinin və raket qoşunlarının başçısı da var.

Qeyd edək ki, iyunun 13-nə keçən gecədən İsrail və İran bir-birinə zərbələr endirir və ölkələr bir-birinə qarşı "Oyanan şir" və "Doğru vəd 3" hərbi əməliyyatlarına başlayıblar.

İsrail nüvə və hərbi obyektlərə, eləcə də yüksək rütbəli hərbçilərə hücum edib.

16:48

İsrailin respublikanın mərkəzində yerləşən Mərkəzi vilayətinə endirdiyi zərbə nəticəsində İslam İnqilabı Keşikçiləri Korpusunun (SEPAH, İran Silahlı Qüvvələrinin elit hissələri) daha iki hərbçisi həlak olub.

Oxu.Az-ın məlumatına görə, bu barədə SEPAH-ın bəyanatında deyilir.

"Sionist rejiminin (İsrail nəzərdə tutulur - red.) qəddar hücumu zamanı işinə sadiq olan iki keşikçi İslam İnqilabını qorumaq missiyasını yerinə yetirərkən şəhid olub", - deyə bəyanatda bildirilir.

16:28

İsrailin İranın şimal-qərbində yerləşən Zəncan vilayətinə endirdiyi zərbə nəticəsində İran Silahlı Qüvvələrinin elit birləşməsi olan İslam İnqilabı Keşikçiləri Korpusunun (SEPAH) üç hərbçisi ölüb.

Oxu.Az-ın verdiyi məlumata görə, bu barədə SEPAH-ın yaydığı rəsmi açıqlamada bildirilir.

"14 iyun səhəri sionist rejiminin (yəni İsrailin - red.) qəddar hücumu zamanı Zəncan vilayətinə bağlı "Ənsar əl-Məhdi" korpusunun üç hərbçisi həyatını itirib", - deyə açıqlamada vurğulanır.