Kanadanın Monreal şəhərində tüfənglə silahlanmış şəxsin sinaqoqa hücumu nəticəsində azı üç nəfər yaralanıb.
Oxu.Az xəbər verir ki, bu barədə CBC telekanalı məlumat yayıb.
Hadisə iyunun 22-də axşam saatlarında şəhərin Kot-de-Nej rayonunda, Dekari bulvarında baş verib.
Şahidlərin sözlərinə görə, kamuflyaj geyimində olan şəxs 30-dan çox atəş açıb. Hadisə yerinə gələn polis əməkdaşları hücumçunu saxlamağa cəhd göstərsələr də, o, hüquq-mühafizə orqanlarının əməkdaşlarına atəş açmağa başlayıb.
Nəticədə iki polis əməkdaşı və bir mülki şəxs ağır yaralanıb. İlkin məlumata görə, hücum edən şəxs cavab atəşi ilə zərərsizləşdirilib.
Səlahiyyətli qurumlar əməliyyat-axtarış tədbirlərinin davam etdiyini bildirib və sakinlərə hadisə baş verən əraziyə yaxınlaşmamağı tövsiyə edib. Həmçinin hücumçunun mümkün əlbirinin olub-olmadığı da araşdırılır.
