Cənubi Koreya kəşfiyyat orqanlarının məlumatına görə, Şimali Koreya lideri Kim Çen Inın qızı Kim Cu Enin kiçik qardaşı və ya bacısı var.
Oxu.Az xəbər verir ki, bu barədə Fransanın BFM telekanalı Cənubi Koreyanın Milli Kəşfiyyat Xidmətinə istinadən məlumat yayıb.
Uşağın cinsi hələlik məlum deyil. Bununla yanaşı, xüsusi xidmət orqanı Kim Cu Enin əvvəllər mövcud olduğu iddia edilən böyük qardaşının olub-olmadığını araşdırmağa davam edir.
"Hazırda Milli Kəşfiyyat Xidməti Kim Cu Enin varis kimi nəzərdən keçirildiyini hesab edir və onun kiçik bacısı və ya qardaşının olduğunu ehtimal edir", - deyə qurumun bəyanatında bildirilir.
Cənubi Koreya kəşfiyyatı hesab edir ki, böyük qardaşın ehtimal edilən mövcudluğu belə Kim Çen Inın varisi ilə bağlı hazırkı mənzərəni dəyişmir. Xüsusi xidmət orqanının qiymətləndirməsinə görə, Kim Cu E hazırda faktiki olaraq varis qismində təsdiqlənmə mərhələsindən keçir.
Şimali Koreya liderinin qızı 2022-ci ildən etibarən atası ilə birlikdə müntəzəm olaraq ictimaiyyət qarşısına çıxmağa başlayıb. O, mühüm dövlət və hərbi tədbirlərdə atasını müşayiət edir. KXDR mediası isə qıza münasibətdə onun xüsusi statusunu vurğulayan ifadələrə üstünlük verir.
