Tehran və Vaşinqton arasında uzun illərdir davam edən qarşıdurmanın yumşaldılması istiqamətində ilk addım ola biləcək qarşılıqlı anlaşma memorandumunun layihəsinin məzmunu məlum olub.
Oxu.Az xəbər verir ki, bu barədə İran Dövlət Teleradio Şirkəti (IRIB) məlumat yayıb.
Sosial şəbəkədə dərc edilən məlumata görə, ABŞ İrana əvvəllər dondurulmuş aktivlərindən 12 milyard dollara çıxış imkanı verməyi öhdəsinə götürüb. Bildirilir ki, bu proses saziş imzalandıqdan sonra 60 gün ərzində başa çatdırılmalıdır.
Məlumat ABŞ və İran arasında fəal diplomatik məsləhətləşmələrin və regionda hərbi gərginliyin davam etdiyi bir vaxtda yayılıb. Bununla belə, Ağ Ev və ya ABŞ Dövlət Departamenti məlumatı təsdiqləməyib. İran tərəfi də söhbətin hələ dəyişdirilə biləcək memorandum layihəsindən getdiyini vurğulayır.
Bundan əvvəl İran tərəfi bəyan etmişdi ki, Tehran xarici banklarda, o cümlədən Cənubi Koreya, İraq və digər ölkələrdə saxlanılan bütün dondurulmuş aktivlərinin açılmasını tələb edir.
"Tasnim" agentliyinin danışıqlara yaxın mənbəyə istinadən yaydığı məlumata görə, İran ABŞ-yə 14 bənddən ibarət təklif paketi təqdim edib. Maliyyə hissəsində Tehran ümumilikdə 24 milyard dolların blokdan çıxarılmasını tələb edib: 12 milyard dollar memorandumun imzalanması və gərginliyin azaldılması mərhələsində, qalan 12 milyard dollar isə nüvə proqramı üzrə danışıqların nəticələrinə uyğun olaraq sonrakı mərhələdə.
Məlumata görə, tərəflər məhz ilk 12 milyard dollarla bağlı müəyyən irəliləyiş əldə ediblər və bu da memorandum layihəsində əksini tapıb. Məlumat təsdiqlənərsə, bu, Donald Tramp administrasiyasının Tehrana verdiyi ciddi güzəşt kimi qiymətləndirilə bilər.
