ABŞ Prezidenti Donald Trampın komandası "Trump TV" adlı şəxsi xəbər kanalını yaradıb. Bu yeni platformanın fəaliyyəti prezidentin təxminən iki ay öncəki çıxışından ibarət videonun nümayişi ilə start götürüb.
Oxu.Az xəbər verir ki, bu barədə "The Washington Sun" nəşri məlumat yayıb.
Prezidentin mətbuat katibi Kaelan Dorr vurğulayıb ki, "Trump TV" administrasiyanın ən mühüm anlarını senzurasız formada birbaşa yayımlayacaq. Onun sözlərinə görə, kanalda əsas media qurumları tərəfindən işıqlandırılmayan kadrlar təqdim ediləcək.
"Bəzi hallarda mətbuat administrasiyanın bütün ABŞ-lilərin rifahı naminə əldə etdiyi çoxsaylı rekord nailiyyətlər barədə ya qeyri-dəqiq məlumatlar verib, ya da ümumiyyətlə heç nə yazmayıb", - deyə Dorr əlavə edib.
"Trump TV"nin canlı yayımları Ağ Evin rəsmi "YouTube" kanalı vasitəsilə, eləcə də qurumun mobil tətbiqinin "Canlı yayımlar" bölməsində həyata keçirilir.
Xatırladaq ki, sentyabrın 18-də Donald Tramp CNN, MS NOW və "Politico" nəşrlərinin jurnalistlərinin Ağ Evə girişinə qadağa qoymuşdu. O, bu media qurumlarını ABŞ administrasiyasının fəaliyyəti ilə bağlı saxta xəbərlər yaymaqda günahlandırıb. Digər kütləvi informasiya vasitələri isə həmkarları ilə həmrəylik nümayiş etdirərək, Donald Trampın iştirak etdiyi rəsmi tədbirləri işıqlandırmaqdan imtina ediblər.
