Banqkokun Cənub dairəsi məhkəməsi "Kainat gözəli" və "ABŞ gözəli" müsabiqələrinin tailandlı həmtəsisçisi Cakkafonq Cakrayutatip haqqında həbs qərarı verib.
Oxu.Az xəbər verir ki, bu barədə "Associated Press" (AP) məlumat yayıb.
Cakrayutatip ilk dəfə 2023-cü ildə dələduzluqda ittiham olunub. Həmin il o, girov müqabilində azadlığa buraxılıb. Lakin 2025-ci il noyabrın 25-də, qanunun tələb etdiyi kimi, iş üzrə məhkəmə iclasına gəlməyib. Bu səbəbdən də onun ədalətdən yaxa qurtara biləcəyinə dair şübhələr yaranıb.
İş üzrə məhkəmə iclası dekabrın 26-na keçirilib.
Bildirilir ki, Cakkafonq və onun "JKN Global Group Public Co. Ltd." şirkətinə qarşı iddia irəli sürülüb. Onlar şirkətin korporativ istiqrazlarının satışı zamanı Ravivat Maskamadul adlı şəxsi aldatmaqda ittiham olunurlar. Ravivat iddia edir ki, o, 30 milyon bat (1 583 214.9 manat - red.) pul itirib. Qeyd olunur ki, şirkət maliyyə çətinlikləri yaşayıb və texniki defolt elan edib. Korporasiyanın ümumi borcu, təxminən, 3 milyard batdır (158 321 490 manat - red.).
2025-ci ilin iyununda Tailandın qiymətli kağızlar və birja komissiyası Cakrayutatipi şirkətin 2023-cü il üçün maliyyə hesabatını saxtalaşdırmaqda ittiham edib. Bundan sonra o, şirkətdəki bütün vəzifələrindən istefa verib.
