Yamaykanın "Kainat gözəli 2025" beynəlxalq müsabiqəsindəki nümayəndəsi Qabriela Henri geyim nümayişi zamanı səhnədən yıxılıb.
Oxu.Az "Jamaica Observer"ə istinadən xəbər verir ki, hadisə nəticəsində Henri Tailandın paytaxtı Banqkokda xəstəxanaya aparılıb.
Həkimlərin sözlərinə görə, həyati təhlükə yaradan heç bir xəsarət aşkarlanmayıb. Özü ixtisasca həkim-oftalmoloq olan Yamayka nümayəndəsinin müsabiqənin finalında iştirak edib-etməyəcəyi hələ ki, məlum deyil.
Qeyd edək ki, 74-cü "Kainat gözəli" müsabiqəsinin tacqoyma mərasimi noyabrın 21-də Banqkokda keçiriləcək. Müsabiqədə 120 ölkədən iştirakçılar mübarizə aparır.
