Niderland hökuməti son vaxtlar müşahidə olunan anomal istilər və davam edən quraqlıq səbəbindən rəsmən su qıtlığı elan edib.
Oxu.Az xəbər verir ki, bu barədə RTL telekanalı məlumat yayıb.
Məlumata görə, ölkədə su ehtiyatlarının idarə edilməsi məqsədilə əlavə tədbirlərin tətbiqinə başlanılıb.
Yağıntıların azlığı və çaylarda, xüsusən də Reyn çayında suyun səviyyəsinin aşağı düşməsi ölkəyə daxil olan suyun həcmini azaldıb, lakin suya olan tələbat artmaqda davam edir.
Hökumət nümayəndələri quraq hava şəraitinin növbəti həftələrdə də davam edəcəyini proqnozlaşdırırlar.
Ölkənin İnfrastruktur və Su Təsərrüfatı Nazirliyindən bildirilib ki, görülən tədbirlər əhalinin içməli su təminatına mənfi təsir göstərməyəcək. Qurumun nümayəndəsi jurnalistlərə açıqlamasında, əhali üçün içməli suyun əlçatan olduğunu və gələcəkdə də belə qalacağını vurğulayıb.
Məhdudiyyətlər müxtəlif regionlardakı mövcud vəziyyətə uyğun olaraq həyata keçiriləcək. Belə ki, suyun səviyyəsini tənzimləmək üçün Reyn çayının qollarındakı bəndlərin iş rejimi dəyişdiriləcək, əlavə qəza nasosları istifadəyə hazırlanacaq.
Bundan əlavə, bəzi bölgələrdə yeraltı mənbələrdən, o cümlədən çaylardan, bulaqlardan və kanallardan suyun götürülməsinə məhdudiyyətlər qoyulacaq. Bu qərar xüsusilə fermerlərin fəaliyyətinə təsir edə bilər, çünki bəzi ərazilərdə suvarma məqsədilə sudan istifadəyə qadağa qoyulacaq.
Xatırladaq ki, iyunun ortalarından iyulun əvvəllərinə qədər Avropa qeyri-adi istilərin təsiri altında olub. Fransa, İspaniya, İtaliya, Böyük Britaniya və bir sıra digər ölkələrdə havanın temperaturu 40 dərəcəni keçib. Həmin dövrdə hökumətlər yüksək hava təhlükəsi elan edərək məktəbləri bağlayıb, kütləvi tədbirləri məhdudlaşdırıb və vətəndaşları küçədə az vaxt keçirməyə çağırıblar.
