ABŞ-ın Nyu-York ştatının qubernatoru Keti Xokul ölümcül xəstə olan insanların könüllü şəkildə həyatdan getmələrinə icazə verən qanunu imzalayıb.
Oxu.Az bildirir ki, bu barədə ABŞ-ın "Politico" nəşri məlumat yayıb.
Məlumata əsasən, qəbul edilən bu qanun ölkədə ən sərt tənzimləmələrdən biri hesab olunur. Həkimlərin proqnozlarına görə, ömürlərinə altı aydan az qalan ölümcül xəstələr həyatdan getmək üçün xüsusi preparat tələb edə biləcəklər. Qanundan yararlanmaq üçün şəxs 18 yaşdan yuxarı olmalı, sağlam düşüncəyə malik olmalı, altı ay ərzində ölümə səbəb olacaq təsdiqlənmiş sağalmaz xəstəlikdən əziyyət çəkməli və dərmanı müstəqil şəkildə qəbul etmək qabiliyyətinə sahib olmalıdır.
Qanunda həmçinin psixi sağlamlığın məcburi müayinəsi və ştatda daimi yaşayış kimi tələblər də nəzərdə tutulub.
Qeyd edək ki, ABŞ-ın 14 ştatında evtanaziyaya icazə verilir. Bu sahədə ilk qanun isə 1994-cü ildə Oreqon ştatında qəbul edilib.
